ကဉ္စိပူရမြို့နှင့် တမီးနာဒူးပြည်နယ်ပြ မြေပုံ
တမီးနာဒူးပြည်နယ်သည် ဗုဒ္ဓဘာသာနှင့် များစွာနီးစပ်သော ပြည်နယ်ကြီး တစ်ခုဖြစ်သည်၊ အိန္ဒိယ နိုင်ငံကြီး ၏ ရှေးဟောင်းလူမျိုးစုကြီးဖြစ်သော ဒြာဗီဒီယန် လူမျိုးများ၏ မွေးရပ်ဒေသကြီး လဲဖြစ်သည်၊ အိန္ဒိယနိုင်ငံ ကြီးတောင် ဘက်အကျဆုံး အစိတ်အပိုင်းဖြစ်ပြီး ရှေးဟောင်း အနုလက်ရာပေါများ ပြည့်စုံ သော မဟာဒေသ ကြီးဖြစ်သည်၊ ရာသီဥတုမှာ ပင်လယ်နှင့်နီးသောကြောင့် အပူ အအေးမျှတသည်၊ အိန္ဒိယနိုင်ငံကြီးသည် လူမျိုး၊ ဘာသာစကား၊ အကျင့်စရိုက်၊ ကိုးကွယ်မှုများရုံမျှမက ရာသီဥတု လဲစုံသည်၊
၂၀၁၁ခုနှစ်နိုဝင်ဘာလတွင် တောင်ပိုင်းသို့ ထွက်ခွာလာခဲ့ရာ မြောက်ပိုင်းတွင် ဆောင်းသည် အပီ အပြင်အေးနေပြီဖြစ်သည်၊ မဂဓတက္ကသိုလ်ကြီးသည် နှင်းမှုံများအောက်တွင် မှုန်ပြပြဖြစ်နေပြီ၊ မဂဓ တက္ကသိုလ်ကြီး၏ အဆောင်၃ ပေါ်မှ ကြည့်လျှင် မဟာဗောဓိစေတီတော်ကြီး တစ်ဝိုက်တွင် နှင်းတွေ မှုံနေပြီ၊ အိန္ဒိယနိုင်ငံကျောင်းသားများဆိုင်ရာ မြန်မာကျောင်းဝန်ကျင်တွင်လဲ နှင်းတို့ဝေနေတတ်သည်၊
ဤသို့ နှင်းဝေနေသော ဆောင်းကို ထားရစ်ပြီး ထွက်ခဲ့ရသည်၊ ဂယာမြို့သို့ ထွက်ခဲ့ရာလမ်းတွင် နှင်းတို့ ပိန်းနေအောင်ကျနေသည်၊ နေရဉ္စရာချောင်းသည် နှင်းမှုများအောက်တွင် ပျောက်လုမတတ် ဖြစ်နေသည်၊ နောက်ခံ ဂယာသီသတောင်တန်းကြီးသည်လဲ နှင်းမှုံများနှင့် ရောထွေး နေသည်၊ အနိုင် နိုင်ကြည့်မှ မြင်နိုင်သည်၊ အိန္ဒိယနိုင်ငံကြီးသည် မြောက်ပိုင်းတွင် ဟိမ၀န္တာတောင်တန်းကြီးနှင့် ပိုပြီး ထိစပ်လျှက်ရှိရာ အအေး လဲပိုသည်၊
ဇာတ်တော်များတွင် ဟိမ၀န္တာတွင် နှင်းများကျပြီး အအေးပိုသော ကြောင့် မြေပြန့်သို့ဆင်းပြီး ဆောင်းရှောင်
ကြရသည်ကို အမှတ်ရသည်၊ အခုလဲ မြောက်ပိုင်းတွင် အအေးပိုပြီး ဆောင်းရှောင် သလိုအနေ မျိုးဖြင့် တောင်ပိုင်းဒေသသို့ ခရီးထွက်ရသည်ပဲ သဘောထားရသည်၊ လိုချင်နေသရွေ့ တောင် ပိုင်းရယ် မဟုတ်၊ မြောက်ပိုင်းရယ်မဟုတ် ခရီးထွက်နေရမည်သာဖြစ်ဟု လဲ တွေးနေမိသည်၊ ခရီးသည် သွားများ၏ ထုံးကိုး..၊
ထူးခြားသည်မှာ ဤကဲ့သို့ ဆောင်းရာသီတွင် တိဗက်ရဟန်းတော်များ ဆင်းလာကြသည်၊ မဟာဗောဓိ စေတီတော်ကြီးကို လာရောက်ဖူးမြော်ကြသည်၊ မြန်မာဘုရားဖူးများလဲ ဤကဲ့သို့ဆောင်းရာသီ တွင် လာရောက်လေ့ရှိကြသည်၊ ထေရ၀ါဒ၊ မဟာယာနဘုရားဖူး အစုံလာရောက်သော ရာသီဖြစ်သည်၊ မတ်တပ်ရပ်လိုက် ပြန်ပြီးဝမ်းလျှား မှောက်လိုက်ဖြင့် ဒိုက်ထိုးနေသကဲ့သို့ မဟာဗောဓိစေတီတော်ကို ဦးခိုက်လျှက် ပူဇော်နေသော တိဗက်ရဟန်းတော်များနှင့် လူပုဂ္ဂိုလ်တို့စည်ကားနေလေ့ရှိသည်၊
အဖြူရောင် စုံညီဖြင့် လင်္ကာသူလင်္ကာသားများကို တွေ့မြင်နိုင်သလို၊ ယောဂီဝတ်စုံများဖြင့် ဘုရားဝတ် ပြု ပူဇော်နေသော မြန်မာဘုရားဖူးများကိုလဲ တွေ့နိုင်သည်၊ မဟာဗောဓိတ၀ိုက်သည် ကမ္ဘာအရပ်ရပ် က လာရောက်ကြသော နိုင်ငံတကာ ဗုဒ္ဓဘာသာများဖြင့်လဲ စည်ကားနေလေ့ရှိသည်၊
မဟာဗောဓိပင်မှ ရွက်သစ်ဗောဓိညောင်
ကျောင်း၊ ကန်၊ဘုရားများ နယ်မြေဟုလူသိ များသော ဗီဟာပြည်နယ်ကြီးကို လွန်ပြီးတောင်ပိုင်း အကျ ဆုံး တမီးနာဒူးပြည်နယ်ကြီးသို့ ထွက်ခဲ့ရပြီ၊
အိန္ဒိယနိုင်ငံကြီးသည် ရှေးခေတ်ကတည်းကပင် ပညာရေးကို အားပေးခဲ့သလို ယခုတိုင်အောင်လဲ ကမ္ဘာ အရပ်ရပ်က ကျောင်းသား ကျောင်းသူ ယောဂီများနှင့် အမြဲစည်ကားနေလေ့ရှိသည်၊ ဗုဒ္ဓဘာသာ ၏ အသက်ဝင်လှုပ်ရှားနေသော အနုလက်ရာများကို လေ့လာလိုသူများသည် အိန္ဒိယသို့ လာကြရ သည်၊ တက္ကသီလာ ( Taxila) မြို့ဟောင်းကြီးသည် တစ်ချိန်က ဗုဒ္ဓဘာသာကြီး ကျယ်မြင့်မှုကို ပြသ လျှက်ပင်ရှိသေးသည်၊
အနုလက်ရာတို့ သက်ဝင်လှုပ်ရှားနေသည်ကို မြင်နိုင်သည်၊ ပညာရှင် အစဉ်အဆက် တည်ထောင် ခဲ့ကြသော နာလန္ဒာတက္ကသိုလ်ကြီးသည် ဆရာပေါင်းထောင်ချီကာ နိုင်ငံတကာက တပည့်ပေါင်းသောင်း ချီလျှက် စာပေသင်ယူပို့ချနေသည်ကို သမိုင်းများတွင် မှတ်တမ်းတင်ထားသလို ယနေ့မျက်မြင် တွင်လဲ ကျောင်းသားပေါင်းများစွာ ရှိနေသေးသည်၊ ယခင်က မဟာယာန သင်ကြား ရာဌာနကြီးတစ် ခုဖြစ်ခဲ့သော နာလန္ဒာမဟာဝိဟာရသည် ယနေ့ ကာလတွင် ထေရ၀ါဒ၊ မဟာယာန ပညာစုံ သင်ကြားနေပြီ ဖြစ်သည်၊
ထို့နောက် ၀ိက္ကမသီလာတက္ကသိုလ်၊ ဥဒန္တပူရီတက္ကသိုလ်ကြီးများသည်လဲ အိန္ဒိယသမိုင်းတွင်မှတ်တမ်း တင်ထားသော ဗုဒ္ဓဒေသနာတော်များကို သင်ယူပို့ချခဲ့ရာ မဟာဌာနကြီးများဖြစ်သည်၊
ဆိုပါ တက္ကသိုလ်ကြီးများသည် မြောက်ပိုင်း၊ အလယ်ပိုင်းရှိ တက္ကသိုလ်ကြီးများဖြစ်သည်၊ တောင်ပိုင်း တမီးနာဒူးပြည်နယ်သည် ထိုကဲ့သို့ တက္ကသိုလ်ကြီးများ သမိုင်းတွင် မတည်ရှိခဲ့သော်လည်း ထေရ၀ါဒ၊ မဟာယာနသမိုင်းတွင် မှတ်တမ်းတင်ထားရသော ပုဂ္ဂိုလ်များပေါ်ထွက်ရာဒေသကြီးဖြစ်သည်၊
ထေရ၀ါဒ အဋ္ဌကထာ ကျမ်းပြုများသည် တမီးနာဒူးပြည်သားများ ဖြစ်ကြသည်၊ မြန်မာနိုင်ငံအပါ အ၀င် ထေရ၀ါဒနိုင်ငံများတွင် အဘိဓမ္မာနှင့် ပတ်သက်ပြီး အဖွင့်ကျမ်းများစွာရှိရာတွင် တိုတိုကျဉ်းကျဉ်းနှင့် အဘိဓမ္မာကို ခြုံငုံအောင်ရေးရေးသားထားသော ကျမ်းမှာ အဘိဓမ္မဋ္ဌသင်္ဂဟကျမ်းဖြစ်သည်၊ ဆိုပါကျမ်း ပြုရှင် အနုရုဒ္ဓါသည် တမီးနာဒူးပြည်နယ်သားဖြစ်သည်၊ တမီးနာဒူး ပြည်ရှိကဉ္စိပူရမြို့ လေးသည် ယခုတိုင်အောင် ပင် ဘာသာရေးနယ်မြေအဖြစ်ထင်ရှာနေဆဲဖြစ် သည်၊
အခြားသော ထေရ၀ါဒ အဋ္ဌကထာဆရာအများစုသည်လဲ ကိဉ္စိပူရနှင့် နီးစပ်ခဲ့ကြသူများဖြစ်ကြသည်၊
ရှင်မဟာဗုဒ္ဓဃောသသည်ပင် ကိဉ္စိပူရတွင် နေထိုင်သီတင်းသုံးခဲ့ဖူးကြောင်း မှတ်တမ်းရှိသည်၊
ထို့ ထက်ပို၍ ထူးခြားသည်မှာ မဟာယာနဇင်ခေါင်းဆောင် ဗောဓိဓမ္မဖြစ်သည်၊ သူသည် ပလ္လ၀မင်း ဆက် အနွယ်ဖြစ်သည်ဟု အဆိုရှိသည်၊ တမီးပြည်နယ်တွင် အခြားသော သမိုင်းဝင်ပုဂ္ဂိုလ်များ ထက်ပိုမို ကျော် ကြားသည်၊ တရုတ်နိုင်ငံသို့ သွားရောက်ပြီး အသက်ကို မငဲ့မကွက် ကျင့်ကြံကြိုးကုတ်အား ထုတ်သည်၊
ယနေ့တွင် ဇင်ဘာသာ၏ ခေါင်းဆောင်ကြီး အဖြစ် တလေးစားကိုး ကွယ်ကြသည်၊ တရုတ် နိုင်ငံနှင့် ဂျပန်နိုင်ငံများတွင် ကျော်ကြားသော ရှောင်လင် အတတ်ပညာများကို တီထွင်သူ အဖြစ်လဲ သိကြ သည်၊ မြန်မာရဟန်းတော်များ ရောက်ရှိချိန်တွင် ဗောဓိဓမ္မရုပ်ရှင်ဇာတ်ကားပြသနေခြင်းက ပိုမို အာရုံစိုက် စရာ ဖြစ်လာသည်၊ ရှောင်လင်သိုင်းတတ်သလားမေးကြသည်၊
မဟာယာန ဇင်ဗုဒ္ဓဘာသာခေါင်းဆောင်ကြီး ဗောဓိဓမ္မ
တမီနာဒူးပြည်နယ်၊ chidambaram မြို့လေးသို့ မြန်မာရဟန်းတော်များ အခြေချမိတော့ ပထမဆုံး အမေးခံရသည့်မေးခွန်းမှာ ဗောဓိဓမ္မကို သိသလားပင်ဖြစ်သည်၊ တမီးနာဒူးပြည်နယ်ကြီးသည် ထေရ၀ါဒ
နောက်ခံသမိုင်းခန့်ထည် သော်လဲ မဟာယာနခေါင်းဆောင်ကြီးကိုသာ လူသိများနေသည်၊
ကဉ္စိပုရမြို့သည် ထေရ၀ါဒ မဟာယာန နှစ်မျိုးလုံးနှင့် သက်ဆိုင်သော ဒေသထူးပင်ဖြစ်သည်။
No comments:
Post a Comment