Monday, March 18, 2013
တို့ မြန်မာ အလှသာ
စိမ်းစိုမှည့်ဝင်း လယ်ယာခင်းနှင့်
မြေ၀င်းသန့်သန့် တလင်းပြန့်ဝယ်
စပါးနယ်သည် အမိမြန်ပြည်နှင့် တူပါသည်။
ချောင်းမြောင်း အင်း အိုင် ဂနိုင်သာမော
တောင်ကြော စမ်းရေ ဖြာဖြာဝေသည်
အမိမြေသို့နှယ် လှပါသည်။
ချောင်းမြောင်း သာမော လယ်ယာပေါလည်း
တောင်ကြော ရွာစဉ် မမြင်စေတီ
ထုံးမချယ်သည် မြန်ပြည်ဘယ်သို့ မီအံ့နည်း။
............................................................................................................................................
အိန္ဒိနိုင်ငံ တောင်ပိုင်း၊ တမီးနာဒူးပြည်နယ်မှ မြောက်ပိုင်း ဗုဒ္ဓဂယာသို့ အသွားရထားပေါ်တွင်ရေးပါသည်။
ထာဝရ မြတ်ဆရာ
ထာဝရ မြတ်ဆရာ
........................
ပျက်စီးတတ်စွာ ထုံးစဉ်လာမို့
သေချာပျောက်ပျက် မငြင်းရက်ပါ။
ကြွေလွင့်တတ်စွာ ဓမ္မတာမို့
သေချာကိုင်ဆွဲ မခိုင်မြဲပါ။
ဖြစ်လာသဘော အပျက်နှောမို့
မပျက်ပြယ်သော မပြောလိုပါ။
ပျောက် ပျက် မခိုင် မပိုင်သဘော
ရှိပါသော်လည်း ..
အရှင့်ဂုဏ်သွင် ပျက်မထင်ပါ။
အရှင့်တန်ဘိုး ဘယ်မငြှိုးပါ။
မြတ်နိုးတတ်ငြား နောက်နှောင်းသားတို့
ရင်မှာ အမြဲရှိမည်ဘုရား။
........................
ပျက်စီးတတ်စွာ ထုံးစဉ်လာမို့
သေချာပျောက်ပျက် မငြင်းရက်ပါ။
ကြွေလွင့်တတ်စွာ ဓမ္မတာမို့
သေချာကိုင်ဆွဲ မခိုင်မြဲပါ။
ဖြစ်လာသဘော အပျက်နှောမို့
မပျက်ပြယ်သော မပြောလိုပါ။
ပျောက် ပျက် မခိုင် မပိုင်သဘော
ရှိပါသော်လည်း ..
အရှင့်ဂုဏ်သွင် ပျက်မထင်ပါ။
အရှင့်တန်ဘိုး ဘယ်မငြှိုးပါ။
မြတ်နိုးတတ်ငြား နောက်နှောင်းသားတို့
ရင်မှာ အမြဲရှိမည်ဘုရား။
အရှင်စန္ဒနသာရ( မန်း)
Friday, March 1, 2013
ကျနော့် အဖေ့ သူငယ်ချင်း
လူမှန်းသိကတည်းက တစ်ယောက်တည်း။
ကျောင်းနေချိန်ကျတော့
အထီး မကျန် တစ်ကျန်။
ကိုယ်ခြေထောက်ပေါ် ကိုယ်ရပ်နိုင်တော့ အဖော်မဲ့ခဲ့သူ တစ်ယောက်အကြောင်း။
………………..
မန္တလေးမြို့မှ ထွက်လာသော ဟိုင်းလတ်ကားလေးသည်
မိတ္ထီလာသို့ ညနေပိုင်း နှစ်နာရီကျော်ကျော် တွင် ရောက်သည်။ ပျော်ဘွယ်သို့ ခရီးဆက်ရဦးမည်မို့။
ရှေ့ခရီးဆက်ရန် စုံစမ်းရသည်။
ပျော်ဘွယ်မြို့မှ နတ်မောက်သို့ ညနေ ၄နာရီတွင် ထွက်မည့်
ကားတစ်စီးရှိကြောင်းသိရသည်။
သို့ဖြင့် ပျော်ဘွယ်မြို့သို့ ထွက်ခွာမည့်ကားကို မိတ္ထီလာကားဝင်းတွင်
လိုက်ရှာရသည်။
အဆင့်သင့်သော် ကားလေးပေါ်တွင် ခရီးသည်တစ်ချို့နှင့် ပျော်ဘွယ်သို့။
လေးနာရီထိုးလုလုနီးပါးတွင် ပျော်ဘွယ်ကားဂိတ်သို့ရောက်သည်။
ခေါင်းပေါင်းထားကြသော အညာသူ အညာများကိုတွေ့ရသည်။ ကိုယ်ကိုယ်တိုင်လည်း အညာသားမို့ ဆွေမျိုးများတွေ့လေးမလားကြည့်မိသည်။
လူချင်းမသိတောင် ရွာမေးလိုက်ပါလျင် အညာသားအဖြစ်ကို လူများသိကြပေမည်။
သို့သော် မမေးဖြစ်ခဲ့ပါ။
ဦးဇင်း၊ ဘယ်ကြမလဲ။ အရှေ့ခန်းကြွပါဘုရား။
ကုန်စုံတင်ထားသော ကားကြီး၏ အရှေ့ခန်းတွင်
လိုက်ပါရသည်။
ဂျိုးဂျိုးဂျိန်းဂျိန်း ဖုန်းအလိမ်းလိမ်းဖြင့် အညာလမ်းကိုကြားကြမ်းကြီးဖြတ်ပြေးနေသည်။
..............
...............
ဘယ်ဆင်းမှာလဲ ဘုရား။
ဒကာကြီးရေ။ ဦးဇင်းသစ်လှကျင်းမှာဆင်းမယ်ဗျာ။
အော်၊ တင်ပ၊
အကွေ့ အကောက် အနိမ့် အမြင့်များကို
စနစ်တကျလိုက်ပါးရင် သူဆက်မောင်းနှင်သည်။
သစ်လှကျင်းက နှစ်ခုရှိတယ်ဘုရား၊ အနောက်သစ်လှကျင်းနဲ့
အရှေ့သစ်လှကျင်းဆိုပြီး..
အော်၊ ဦးဇင်းက လျှော်ချောင်းနားက သစ်လှကျင်းပါ
ဒကာကြီး။
အော်..၊ တင်ပ၊ တင်ပ။
တပည့်တော်တို့က ရွာတော်နားက သစ်လှကျင်းကိုပဲ
ရောက်ပါမယ်ဘုရား။ မိုးတောင်ချုပ်နေပြီ။
ရပါတယ်ဘုရား။ အနောက်သစ်လှကျင်းကို တပည့်တော်
အသိတစ်ယောက်ဆိုင်ကယ်နဲ့ လိုက်ပြီး အပို့ခိုင်းပါ့မယ်ဘုရား။
သူပြောရင်း ကားစက်ကို မသိမသာတင်လိုက်သည်။
ကျေးဇူးတင်စရာကောင်းလှသည်။
……………..
ရွာတော်သို့ ရောက်ပါပြီ၊ နေလည်းအရောင်ပျောက်၍
အနောက်ရပ်တွင် တိမ်ရောင်တို့သာတောက်ပ၍ ကျန်ရစ်သည်။
ဟေ့..၊ အ၀ှာရေ၊ ဒီကိုလာစမ်းဦး၊
လူငယ်တစ်ယောက်ပြေးလာသည်။
ဒီဦးဇင်း သစ်လှကျင်းကို ကြွမလိုကွ။
အဲဒါမင်းလိုက်ပို့လိုက်စမ်း။
ဦးဇင်းဘုရား၊ ဒီဒကာလေးကို ဆိုင်ကယ်ဆီသာထည့်ပေးလိုက်ပါ။
သူလိုက်ပို့ပါလိမ့်မယ်ဘုရား။
အိမ်တစ်ချို့ မီးများပင်ထွန်းနေကြပြီ။
ညနေခင်းနေရောင်သည် ကောင်းကင်ယံတွင် ကြည့်နိုင်ပါမှ ခပ်ရေးရေး။
ဆိုင်ကယ် မောင်းသူ လူငယ်ဒကာလေးသည် စေတနာပါပါဖြင့်
လိုက်ပို့သည်။ တပည့်တော်က
ပြန်ရဦးမှာမို့၊
နည်းနည်းစက်ကို တင်ပြီးမောင်းပါမယ်ဘုရား။
ဦးဇင်းသေသေချာချာတော့ သတိထားပြီး လိုက်ပါဘုရား။
လေသည် တ၀ူးဝူးဖြင့် လူကိုတိုးဝှေ့သည်။
အနိမ့် အမြင့် အတက် အဆင်းများတွင် ရင်ထဲ တသိမ့်သိမ့်။
……………..
……………………
တပည့်တော်ရွာထဲအထိတော့ လိုက်မပို့နိုင်တော့ဘူးဘုရား၊
ပြန်ရဦးမှာမို့။
ဒီကနေ မြေလမ်းအတိုင်းဆက်သွာရင် လျှော်ချောင်းရွာကို
ရောက်ပါတယ်ဘုရား။ ရှေ့က ကုန်းတန်းလေး ကို ကျော်လိုက်ရင် ရွာ့တောင်ဘက် အပေါက်ပါပဲဘုရား။
အော်..၊ ကျေးဇူးတင်တယ်။ ကိုယ့်ညီရယ်။
အေးပါ၊ အေးပါ။ ကိုယ်ဆက်လျှောက်လိုက်ပါ့မယ်။
နိမ့်တစ်ခါ မြင့်တစ်လှည့်၊ ဖရုံခင်းတစ်တန်၊
ပဲခင်းတစ်ချို့၊ ပြောင်းခင်းစိုစိုသည် မှောင်ရီရီတွင် အိပ်စက်တော့မယောင်ရှိနေကြသည်။
……………
ရွာဦးကျောင်းသို့ရောက်တော့ ကျောင်းရှိ
ကိုရင်နှင့် ကျောင်းသားများ ဘုရားဝတ်တက် အပြီး ကြေးစည် ထိုးပြီး အမျှဝေနေကြပြီ။
ကျောင်းလှေကားအနီးက စဥ့်အိုးများအကြားတွင်
ထန်းရည်မူးနေဟန်ရှိသည် ဒကာကြီးတစ်ဦးလဲနေသည်။ အမျှဝေခြင်းနှင့် ထန်းရည်မူးသည် အလှသလိုလိုထင်မိသည်။
…………
မောင်ပဇင်းက၊
မှန်ပါ၊ တပည့်တော်က ဒီရွာက ဦးထွန်းအေးရဲ့
သားပါဘုရား။ အဖေဆုံးတဲ့ နှစ်ပတ်လည်မို့ အဖေ့ရွာကိုလာပြီး၊ ဘုရားပုံတော်လှူခြင်းပါဘုရား။
အော်..။ အေး၊ အေး၊ ဒါပေမယ့် ငါ့တပည့်တွေ အကြားမှာ
ထွန်းအေးဆိုတာ မမှတ်မိဖြစ်နေ တယ်မောင်ပဇင်းရေ။
အော်..။ မှန်ပါဘုရား၊ တပည့်တော် ဦးဓမ္မောဘာသရဲ့
သားပါဘုရား။ တဲကြီးကုန်းသူနဲ့ အိမ်ထောင်ကျသွား တဲ့ ဒီရွာသားဦးဓမ္မောရဲ့သားပါဘုရား။
အော်..။ ဟုတ်ပြီ၊ သိပြီးပေါ့၊ အော်..၊
အော်..၊ မောင်ပဇင်းက ဓမ္မောရဲ့သားကိုဗျ။
အခုဓမ္မောမရှိတော့ဘူးလား၊ အင်း…။ တယ်ပြီးလဲ
စောကြပေတာကိုးကွ။
ငါတောင်မသိလိုက်ရပါဘူးကွာ။
ပြောရင်ဖြင့် ဆရာတော်သည် မျက်မှောင်ကုတ်၍
အတိတ်ကိုကြည့်နေမိဟန်ရှိသည်။
အေးး..၊ အေးး.။
ဟု သာ အသံလေးလေးဖြင့် မိန့်တော်မူသည်။
………………
နောက်နေ့မနက်ခင်းကိုရင်များရွာထဲသို့
ဆွမ်းခံဝင်ကြသည်။
ကျောင်းလှေကားအနီးတွင် ထန်းရည်မူနေဟန်ရှိသော
ဒကာကြီးကား ခြေသံကြားသဖြင့်
ခေါင်းထောင်ကြည့်သည်။
အာ..။ ဦးဇင်းဘယ်ကလဲ..၊ အရင်ကမမြင်ဖူးပါဘူး။
အော်..၊ ဒကာကြီး ဦးဇင်းက ဒီရွာက ဦးထွန်းအေး..အဲ..အဲ..၊
ဦးဓမ္မောရဲ့သားပါဗျာ။
ဘုရား..ဓမ္မော..ဟုတ်လားဘုရား၊ တဲကြီးကုန်းသူနဲ့ရတဲ့
ပွေလီလို့ခေါ်တဲ့သူလား။
အင်းဟုတ်ပါတယ်၊ ဒကာကြီး၊
အခုဦးဇင်းက ဘာလုပ်ကြွလာတာတုန်းဘုရား။
ဦးဇင်းဒကာကြီးဆုံးတဲ့ နှစ်ပတ်လည်မို့
အဖေ့ရဲ့ ငယ်ဆရာကျောင်းမှာ ဘုရားပုံတော်လာလှူတာပါ ဒကာကြီး။
ဘုရား..။ ပွေလီ ဆုံးပြီလားဘုရား။
….
…..
တပည့်တော်က မိဘမဲ့မို့ ငယ်ငယ်ကတည်းက
ဆရာတော့်ကျောင်းကို ရောက်ရပါတယ်။
အဖော်မဲ့ပေါ့ဘုရား။
ကျောင်းရောက်တော့ ဦးဇင်းအဖေဖြစ်လာမယ့်
ပွေလီနဲ့ တွေ့ပြီး။
အထီးကျန်လို့ မဆိုနိုင်တော့တဲ့ ဘ၀လေးကို
ပျော်ပျော်ရွှင်ရွှင်ဖြတ်သန်းခဲ့ရပါတယ်။
တပည့်တော်ဘ၀မှာ အရင်းအနှီးဆုံး၊ အားအကိုးဆုံး၊
နားအလည်ဆုံးသူငယ်ချင်းဆိုတာ ဦးဇင်းရဲ့ အဖေပါ။
နောက်တော့ ပွေလီက ပဇင်းဘောင်တက်ပြီး။
မြို့စာသင်ထွက်တယ်။
( ၇) ၀ါရတော့ လူဝတ်လဲပြီး၊ ရှမ်းပြည်၊
ရှမ်းရွာတွေရောက်တယ်ကြားရပါတယ်။
နောက်တော့မှ တဲကြီးကုန်းသူနဲ့ အိမ်ထောင်ကျပြီး..။
ဘယ်ရောက်သွားတယ် မသိရတော့ပါဘူးဘုရား။
ပြောရင်း မျက်ရည်များတဖြိုင်ဖြိုင်ကျလာသည်။
ရှိုက်ရှိုက်၍လည်း ငိုနေသည်။
အော်..၊
ဒကာကြီး၊ ဦးဇင်းတို့ မန်းလေးဘက်မှာနေပါတယ်။
သူ့ကို စကားထောက်ပေးလိုက်သည်။
လွန်ခဲ့တဲ့ နှစ်ပေါင်း သုံးဆယ်ကျော်လောက်
အဖြစ်အပျက်တွေပါဘုရား။
ဒါပေမယ့် အခု ပွေလီဆုံးပြီဆိုတာ သိရတော့၊
အသက်ပိုကြီးသွားသလို၊ အထီးကျန်ပိုဆန်သွားတယ်ထင် မိပါတယ်ဘုရား။
ဒါပေမယ့် ထန်းရည်မူးနေတုန်းမို့ အမိုက်ဇာတ်မသိမ်းနိုင်ဖြစ်နေရပါတယ်။
မျည်ရည်ဖြိုင်ဖြိုင်ဖြင့် ဦးအကြိမ်ကြိမ်ချနေသော
အဖေ့သူငယ်ချင်းဆိုတဲ့ ဒကာကြီးသည် တစ်သိမ့်သိမ့်ရှိုက်၍ တုန်နေသည်။
သူ့ရှိုက်သံသည် မိမိရင်သို့ ကူးလုလုရှိသည်။
…………………
ရွာထဲမှ ဆွမ်းခံအပြီးပြန်ကြွလာသော ကိုရင်နှင့်ကျောင်းသားတို့သည်
စကားပြောရင်း တွန်းတိုက်ရင်း
ဖြင့် ကျောင်း အတွင်းသို့ ၀င်လာကြပြီ။
ငယ်သူများဘ၀မို့သူတို့ ပျော်ရွှင်နေကြသည်။
Sunday, January 20, 2013
ပေးဆပ်သူတို့ နှလုံးသား( ၁)
ဂင်္ဂါမြစ်ကြီးသည်
စတင်စီးဆင်းရာ နှင်းတောင်တန်း ဟိမ၀န္တာမှသည် ခရီးဆုံးစီးဝင်သွားရာ ဘင်္ဂေါပင်လယ် အထိ အိန္ဒိယနိုင်ငံကြီးကို
အကျိုးပြုသွားသည်၊ ဂင်္ဂါမြစ်ကမ်းတွင် ဟိန္ဒူနတ်ဘုရား အများအပြားရှိသည်။
ဂင်္ဂါမြစ်ကမ်း
နဖူးတွင် ဝေဒကျမ်းပြုရှင်ယောဂီရသေ့ကြီး အသီးသီးတို့ ပူဇာတေးဖွဲ့ကြသည်၊ သကျနွယ်ဖွား
ဗုဒ္ဓဘုရားရှင် ဂင်္ဂါမြစ်ကမ်းတွင် ထိုင်နေတော်မူလျှက် တပည့်သား သံဃာတော်တို့အား တရားဟောသည်၊
အိန္ဒိယနိုင်သည်
ခေတ် အဆက်ဆက်ကတည်းကပင် ပညာရေးကို အလေးပေးဆောင်ရွက်ခဲ့သည်၊ လောကီ ပညာရပ်၊ လောကုတ္တရာပညာရပ်
အစုံစုံတို့ဖြင့် ထင်ရှားသည်၊ စာပေ၊ အနုသုခုမ၊ ပန်းချီ ပန်းပု၊ စိုက်ပျိုးရေး၊ လူနေမှုစနစ်၊
ဘာသာရေး၊ ပညာရေးစသည်ဖြင့် ရှေ့ဆောင် ခဲ့သော နိုင်ငံကြီးဖြစ်သည်။
လွန်ခဲ့သော ဘီစီ ၂၅၀၀ကျော်က ထွန်းကားခဲ့သော မိုဟင်ဒါရို၊ ဟာရပ္ပခေတ်များတွင်
တူးဖော်ရရှိသော အနုလက်ရာများက အိန္ဒိယနိုင်ငံကြီး၏ အနုလက်ရာ၊ စာပေ၊ ဘာသာရေးများကို ထင်ထင်ရှားရှားဖော်ပြ လျှက်ရှိသည်။
ဘီစီသုံးထောင်စု ၀န်းကျင်ကာလများသည်
အိန္ဒိယနိုင်ငံကြီးလူနေမှု စနစ်ကြီးကျယ်ထွန်းကာခဲ့ပုံ ကိုတွေ့ မြင်နိုင်သည်။ လူသားယဉ်ကျေးမှု
(cradle of human culture) စတင်ထွန်း ကားလာရာဟုဆိုနိုင်သော အီဂျစ်၊ ဘေဘီလုံနီးယားယဉ်ကျေးမှုများနှင့်
တန်းတူရှိခဲ့သည်။
ဂင်္ဂါမြစ်ကြီးနှင့် ယမုံနာမြစ်တို့စီဆင်းရာ အိန္ဒု မြစ်ဝှမ်းကို အခြေတည်ပြီး
ထွန်းကားခဲ့သော ယဉ်ကျေးမှုကြီး သည် ဟိမ၀န္တာ တောင်တန်းကြီးအခြေမှသည် တောင်ဘက် ယနေ့ ဘုံဘေ အထိ၊
အနောက်ဘက်တွင် ပါကစ္စတန်၊ အရှေ့ဘက် တွင် ဆင်းမလား အထိကျယ်ပြန့်ခဲ့သည်။
ဤကျယ်ပြန့်သော
ဒေသကြီးအတွင်းတွင် များပြားပြည့်စုံသော အိန္ဒုမြစ်ဝှမ်း ယဉ်ကျေးမှုကြီးကို ထူထောင်နိုင်ခဲ့သည်၊ ယနေ့ကမ္ဘာ အရပ်ရပ်ရှိတက္ကသိုလ်များတွင် ရှေ့တိုင်းဌာန( oriental studies) များရှိသည်၊
ထိုဌာနတွင်တစ်ခုအပါအ၀င်ဖြစ်သော အင်ဒိုလိုဂျီ( indology) သည် အိန္ဒိယနိုင်ငံကြီး၏ ထွန်းကားခဲ့သော
စာပေ အနုလက်ရာများကို လေ့လာသော ပညာရပ်ဖြစ်သည်။
ထိုပညာရပ်များတွင်၊ ဟိန္ဒူဘာသာဆိုင်ရာ
ကျင့်ဝတ်၊ ဓလေ့ထုံးစံ၊ ဒဿန၊ ဗုဒ္ဓဘာသာဆိုင်ရာ ကျင့်ဝတ်၊ ဓလေ့ထုံးစံ၊ အယူအဆ ဒဿန၊ ဂျိန်းဘာသာဆိုင်ရာ၊
ဓလေ့ထုံးတမ်း၊ သက္ကတစာပေ၊ ပါဠိစာပေ၊ ဒြာဗီဒီ ယန် ယဉ်ကျေးမှုစသည်ဖြင့်လေ့လာ၍ မကုန်ဆုံးနိုင်
အောင်ကျယ်ပြန့်လှသည်။
အိန္ဒိယတိုက်ကြီးသည်
ကိုးကွယ်ရာဘာသာ တရားများအနေနှင့်လည်း ဟိန္ဒူဘာသာ၊ ဂျိန်းဘာသာ၊ ဗုဒ္ဓဘာသာ၊ ဆစ်ဘာသာတို့
အပြင် နတ်ကိုးကွယ်မှုနှင့် ရိုးရာထွေးပြားသော ကိုးကွယ်ရာများဖြင့် ထင်ရှား သည်။
ထိုတွင်
ဗုဒ္ဓဘာသာနှင့် ဂျိန်းဘာသာတို့သည် အာရယန်နှင့် ဒေသခံဒြာဗီဒီယန်တို့၏ ဇာတ်စနစ်၊ ကမ္မ၀ါဒ၊
ရှေ့ဘ၀ နောက်ဘ၀၊ သမဏ ဗြဟ္မဏ၊ တောထွက်ပြီး သညာသီအဖြစ်ဖြင့် နေထိုင်ခြင်းစသည့် ယှဉ်ပြိုင်မှု
အမြင့်ဆုံးကာလတွင် ပွင့်ပေါ်ခဲ့ကြခြင်းဖြစ်သည်။
ထိုဘာသာကြီးနှစ်ခုတွင် ဗုဒ္ဓဘာသာသည် ကြီးမားသော
ပညာရေး အ၀န်းအ၀ိုင်းကြီး ကို ဖော်ဆောင်နိုင်ခဲ့ သည်၊ ဘုရားရှင်သည် နောက်ပါတပည့်သား သာဝကများ
အတွက် ရှေးဟောင်း အိန္ဒိယနိုင်ငံကြီး၏ အခြားသော ဘာသာရေးများနှင့် မတူ လောကကြီးနှင့် ညီညွတ်သော
စည်းကမ်း ၀ိနည်းဥပဒေကို ပညတ် သတ်မှတ်ခဲ့သည်။
ခေတ်ပြိုင် အိန္ဒိယနိုင်ငံကြီး၏ သဗ္ဗညု အမည်ခံ ယောဂီဂုရုများ၏
အယူအဆများနှင့်လည်း အခါအားလျှော် စွာ တိုက်ဆိုင်ဟောပြောခဲ့သည်၊ သုတ္တန္တဒေသနာ တော်များသည်
ဗုဒ္ဓ၀ါဒနှင့် ယခင်ရှိနှင့်ပြီးသား အိန္ဒိယ
ရှေးဟောင်း ၀ါဒများကိုနှိုင်းယှဉ်ထားသော ဥပဒေသများ
ဖြစ်သည်။
ဝိနည်း၊ သုတ္တန္တများထက်ထူးခြားသော အခြားအိန္ဒိယရှေး ဟောင်းဘာသာတရားများတွင် မတွေ့နိုင် သော ရုပ်ဖြစ်စဉ်၊ နာမ်ဖြစ်စဉ်များကို အသေးစိတ်ဟောကြားထားသည့် အဘိဓမ္မာတရားတော်ကိုလည်း တပည့် သားသာဝကများအား ဟောကြားခဲ့သည်။
မြတ်ဗုဒ္ဓ၏
ထိုအဘိဓမ္မတရားတော်ကို ယနေ့ခေတ် အမြင်ဒဿန( philosophy) များနှင့် လွန်စွာ ကိုက်ညီသော
ဟောဖော် ညွှန်ကြားချက်များဖြစ်သည်ကို အနောက်တိုင်းပညာရှင်များက လက်ခံ ယုံကြည် ကြသည်။
အိန္ဒိယ နိုင်ငံရှိဘာသာ အယူဝါဒ ဆိုင်ရာ ဒဿန(
philosophy) များကို လေ့လာရာတွင် ဗုဒ္ဓဒဿနသည် သုတေသီ တို့အား ပိုမို နှစ်သက်မှုကိုဖြစ်စေသည်။
ယူဆရုံ သက်သက်သာမက
လက်တွေကျင့်သုံးမှု ပါဝင်နေ ခြင်းက အခြားသော ဘာသာတရားများထက် ပိုမိုပြီး အလေးဂရုပြုစရာဖြစ်လာသည်၊
အသစ်သစ် ပေါ်လာသော ဒဿန (philosophy) နှင့် တိုက်ဆိုင်ပြီးလေ့လာ နိုင်သည်။ သိပ္ပံပညာရပ်
အားလုံးနှင့် မျက်နှာချင်းဆိုင် ဆွေးနွေးနိုင် သည်။ ဘာသာရေးသမားတစ်ယောက် မဟုတ်သော ကမ္ဘာ့သိပ္ပံပညာရှင်
အိုင်းစတိုင်းသည်ပင် ဗုဒ္ဓဘာသာ ၏ နောက်ပေါ် သိပ္ပံများနှင့် ညီညွတ်ပုံကို အသိအမှတ်ပြုခဲ့သည်။
ဤအချက်များကြောင့်ပင်
တစ်ချိန်တည်းလိုလို ပေါ်ပေါက်ခဲ့သော ဂျိန်းဘာသာထက် ဗုဒ္ဓဘာသာသည် ကမ္ဘာ့ အလယ်တွင် လူသားအားလုံးနှင့်
ညီညွတ်ပြီး ပျံ့နှံ့ကျင့်သုံးမှု ပိုသည်၊ အရှေ့အာရှနှင့် အရှေ့တောင် အာရှနိုင်ငံအများစုသည်
ဗုဒ္ဓဘာသာ၏ ပျံ့နှံ့ဖြစ်ထွန်းရာဒေသ ကြီးဖြစ်ခဲ့သည်။
ဘုရားရှင် သက်တော်ထင် ရှားရှိစဉ်ကာလများတွင်
မဂဓတိုင်း၏ ဘုရင်ဗိမ္ဗိသာရမင်း၊ သားဖြစ်သူ အဇာတသတ်မင်း၊ ကာသိကောသလ တိုင်းဘုရင် ကောသလမင်း၊
ကောသမ္ဗီရှင်ဘုရင် ဥဒေန၊ မလ္လာမင်း စသော မဇ္ဈိမအာဏာပိုင်များနှင့် ဘာသာရေး ပဋိပက္ခမရှိ
ငြိမ်းချမ်းမှုရစေခဲ့သည်။
ဆရာဒကာညီညွတ်စွာဖြင့်
အနှုိုင်းမဲ့ အဆုံးအမများကို တည်ထောင်တော် မူခဲ့သည်။ ကိုယ်ကျင့် သီလမြင့် မား စေခဲ့သည်၊
အာဏာပိုင်ဘုရင်များကိုလည်း မင်းကျင့်တရားနှင့် အညီမင်းလုပ်နိုင်ရန် လမ်းညွှန်ချက် များကို
ဟောပြောမိန့်ကြားခဲ့သည်။ ဘာသာ ရေးခေါင်းဆောင်နှင့် နိုင်ငံပိုင် အာဏာရှင် တို့၏ ညီညွတ်စွာ
အလုပ်လုပ် ခဲ့ပုံကို အခြားဘာသာများထက် ဗုဒ္ဓဘာသာတွင် ပိုမိုမြင်နိုင် သည်။
အတိုင်းတိုင်းအပြည်ပြည်က
မင်းများ ဆောက်လုပ်လှူဒါန်းထားသော ကျောင်းဝိဟာရတို့သည် ထင်ရှားပေါ် လွင်ခဲ့ပြီး ယနေ့တိုင်အောင်
သမိုင်း မှတ်တိုင်များ အဖြစ် တွေ့မြင်နိုင်သေးသည်။
မေတ္တာတရားကြီးမားခြင်း၊
အခြားဘာသာများပေါ်တွင်ထားသော နူးညံ့သောသဘော တရားများကြောင့် လည်း ရှိရင်းစွဲ ဂျိန်းဘာသာ၊
ဗြဟ္မဏဘာသာတို့နှင့် ကြီးမားသောပဋိပက္ခများ မရှိခဲ့ပေ။
ပြီး နှစ်ပြည်ထောင်
ငြိမ်းချမ်းရေးတရားဟောခဲ့ခြင်းသည် ဗုဒ္ဓဘာသာ၏ ထူးခြားသော မှတ်တမ်းဖြစ် သည်။
မြတ်ဗုဒ္ဓ
၏ ဆုံးမ သွန်သင်ချက်တို့သည် စိတ်ငြိမ်းရေး သက်သက် အဇ္ဈတ္တကိုသာ ဂရုပြုထားသည် မဟုတ် ပြင်ပ
ဗဟိဒ္ဓ ငြိမ်းချမ်းရေးကိုလည်း ဖြစ်စေနိုင်ကြောင်း ထင်ရှားသော သာဓကပင်ဖြစ်သည်။
ထို့အပြင် ဗုဒ္ဓဘာသာသည်
ဘာသာရေး ပဋိပက္ခကို ဖန်တီးသည်ကို မတွေ့နိုင်ပေ။ ဘာသာတရားများဖြင့် ရှုပ်ထွေးနေသော ကေသမုတ္တိ
ဒေသလို နေရာမျိုးကိုပင် ဘာသာရေး မရှုပ်ထွေးအောင် ရှင်းလင်ပြခဲ့ သည်က သက်သေပင်ဖြစ်သည်။
ဘာသာရေးတွင် အစဉ် အလာများကို အလေးမထားဖို့နှင့် ကိုယ်တွေ့ဖြင့်သာ အမှား အမှန်၊ အကျိုးရ
မရကို ဦးစားပေးဆွေးနွေးခဲ့သည့် ဖြစ်ရပ်သည်။ မည်သည့် ဘာသာတွင်မှ မတွေ့နိုင်သော ဘာသာတရား များစွာတို့တည်ရှိရာ
အိန္ဒိယနိုင်ငံ အတွင်းက ဗုဒ္ဓဘာသာ၏ ဖြစ်ရပ်မှန် တစ်ခုဖြစ်သည်။
Saturday, January 12, 2013
မဇ္ဈိမ
အထင်ကရ မဇ္ဈိမ
ခရီးသွားကြ ခရီးလာကြ၊
ငြိမ်းချမ်းမှုတွေရှာကြ
တွန်းလှန်မှုတွေပြုလုပ်ကြ။
သမိုင်းလည်းလှ
အယူမျှပြီး ဂင်္ဂါစီးတဲ့ မဇ္ဈိမ၊
ယမုံနာပျော်တဲ့
မဇ္ဈိမ မဟီ သရဗူ၊
အစိရ၀တီတို့
တူယှဉ်တွဲတဲ့ မဇ္ဈိမ၊
မဇ္ဈိမလမ်း
ပေါ်ထွန်းရာ မဇ္ဈိမ။
ရာမတို့ ကပြ
အသုံးတော်ခံခဲ့ကြတဲ့ မဇ္ဈိမ၊
နှင်းတွေဝေတဲ့
မဇ္ဈိမ မိုးတွေစွေတဲ့ မဇ္ဈိမ၊
နွေနေပြင်းတဲ့
မဇ္ဈိမ၊
အရာအားလုံး
လှတဲ့ မဇ္ဈိမ။
သိဒ္ဓတ္ထဂေါတမ
နွယ်ဖွား ဟောကြားတဲ့၊
မင်းမရှိ
ပြည်သူမရှိ ကျွန်မရှိ ဗြဟ္မဏ မရှိ၊
အားလုံး တူညီယှဉ်တွဲ
လျှောက်လှမ်းနိုင်တဲ့ မဇ္ဈိမ၊
အရာအားလုံးတွေထက်
သာ၍လှ။
ဂရိနွယ်ဖွား
အလက်ဇန္ဒား အလည်ရောက်ခဲ့တဲ့ မဇ္ဈိမ၊
မောရိယ အသောကရဲ့
မွေးရပ်မြေ အလှ၊
ဂုရုကြီးတွေ
ပူဇာတေးဖွဲ့တဲ့ မဇ္ဈိမ၊
ဂန္ဓီကြီးသွားခဲ့လမ်းတွေ
ဖုန်မသိပ်သေးတဲ့ မဇ္ဈိမ။
အားလုံးနဲ့အတူ
ချီတက်ခွင့်ရနေတဲ့ မဇ္ဈိမ။
သွားသွားလာလာ
လူစီးကြောင်းကြီးနဲ့
အတူမျောပါခွင့်ရနေတဲ့
မဇ္ဈိမ၊
ဂင်္ဂါစီးနေသရွေ့
အမြဲလှနေမယ့် မဇ္ဈိမ။
.........................................
အိန္ဒိယနိုင်ငံ၊ မြန်မာကျောင်းသားများ အဖွဲ့မှ ထုတ်ဝေနေသော ဒွါဒသမအကြိမ်၊ ကျောင်းသား မဂ္ဂဇင်းတွင်
အရှင်စန္ဒနသာရ အမည်ဖြင့်ဖော်ပြခြင်းခံရသော ကဗျာဖြစ်ပါသည်။
Subscribe to:
Posts (Atom)







